Madaxweyne Sheekh Shariif Sheekh Axmed ayaa shir jaraa’id qabtay shalay oo khamiis ah taariikhduna ahayd 18 da Juunyo 2009 ka. Madaxweynuhu wuxuu ku bilaabay shirka jaraa’id asagoo oranaya:

Ugu horreeyn waxaan tacsi tiiraanyo leh u dirayaa qoyskii uu ka tagey Cumar Xaashi, qaraabadiisii, asxaabtiisii iyo dhammaan dadka Soomaaliyeed. Sidaad lasocotaan, saaka waxaa qof isa soo miidaamiyey uu dilay wasiirkeennii amniga qaranka iyo safiirkeennii hore ee Itoobiya inoo fadhiyi jirey Jaalle C/kariin Laqanyo. Arrintani waxay qayb ka tahay  qorshaha xasilooni darradaa ee Al-qaacida ay kawaddo  Soomaaliya.

Waxaan jeclahay sidoo kale in aan tacsi tiiranyo leh u diro askarteenna geesiyaasha ah ee ku geeriyooday hawlgalladii dhawaantaan. Askarta ku dhaawacnatayna waxaan eebbe uga baryaayaa in uu caafimaad deg deg ah siiyo.

Waddankeenna waxaa kusoo duulay koox argagixisaa kuwaas oo aan aqoonsanayn calankeenna diintana six un u isticmaalaya. Waxaa jira xoogag shisheeye ah oo ku sugan waddankeenna, kuwaasoo sii kordhaya maalinba maalinta ka dambaysa. Masuuliyaddeena ka dowlad ahaan, waa in aan difaacnaa xaqa ay dadkayagu u leeyihiin in ay nabad ku noolaadaan. Waxaan garoowsannahay taageerada shacabkayaga, waxaana ka codsanaynaa in ay taageeradaan kordhiyaan oo ay sii wadaan si aan waddankeenna u bed baadino.

Dadkani, umahayaan Soomaalida wax qorshe ah oo aan ka ahayn in ay kusii hayaan xasilooni darro iyo fawdo. Haddii aan ognahay in ay u hayaan ummadda ajande fiican, waxaan qaadan lahayn go’aan kale. Qorsheheennu waa in aan ka difaacnaa dadka gardarrada noocaan oo kale ah iyo dilalka ay wadaan kooxaha argagixisada ah.

Ciidankeennu wuxuu qabtay shaqo wanaagsan waloo ay jiraan qaladaad ay dadka shacabka ah kula keceen qibraddooda oo yar awgeed. Dowladdu waxay intii karaankeed ah isku dayday in ay ciidamada u hesho hab maamuus wanaagsan, sidaas awgeedna, waxaan magacawnay guddiga maxkamadda sare ee milateriga. Guddigu wuxuu ka koobanyahay:

1. Wasiirka Cadaaladda oo ah                              Guddoonka.
2. Wasiirka Difaaca                                              Xubin
3. Wasiirka Aminiga Qaranka                               Xubin
4. Wasiirka Arrimaha Gudaha                               Xubin
5. Taliyaha Ciidamada Qalabka sida                     Xubin
6. Taliyaha Ciidanka Booliska                               Xubin
7. Taliyaha Sirdoonka Qaranka     Xubin

Ujeedada maxkamaddan sare waa in ay wax ka qabato khaladaadyada dhacaya iyadoo adeegsanaysa sharciga milateriga si waafaqsan shareecada Islaamka.

Maahan wax diinteena waafaqsan in qof aan waxba galabsan la dilo. Dhalinyarada ismiidaaminta samaynaya sida tan ka dhacday maanta Beledweyne, waa kuwo diinta si khaldan u fahansan. Dowladdeenu waxay meel marisay ku dhaqanka shareecada islaamka, waxa mucaaradku samaynayaanna waa wax diinta lid ku ah.

 Al-Qaacida waxay bur burisey Afqaanistaan istiraa-tiijiyaddooduna waxay tahay in ay Soomaaliya bur buriyaan si ay u helaan meel ay ka weeraraan waddamada deriska ah. Waxaan ku boorrineynaa dadkayagu in ay ka qayb qaataan joojinta gardarrada noocan ah. Waddankayaga waxaa soo weeraray dad doonaya in ay argagax ku beeraan dadkayaga.

Dowladdu waxay sii wadi doontaa dib u heshiisiintii gacmahayaguna cidkasta way u furanyihiin. Waxaan ugu baaqaynaa dhammaan dhalinteena in ay la shaqeeyaan dowladda si aan u difaacno qarankeena iyo diinteena. Waxaan ka codsanaynaa dadka Soomaaliyeed in ay naga caawiyaan soo dumitaanka dhallinteena. Ma qabto diinteenu in qof la bireeyo kaddibna intarneedka lasoo geliyo. Waa diintee diinta oggol sidaas?

Waxaan doonayaa in aan u sheego dhammaan muslimiinta in Soomaaliya ay gacanta u gashay kooco diintayada waxyeellaynaya; ma ogolaandoonno in aan diintayada ka weecanno.
 

Beesha caalamka waxaa saran xil, kaasoo ah in ay kaalmo aademinimo lasoo gaaraan dadka ku barakacay duullaankaan. Sidoo kale waxaa beesha caalamka saran xil ah in ay dowladda ka caawiyaan dhammaan waxa ay u baahantahay si ay dalka xasilooni iyo nabadgelyo ugu soo dabbaasho. Beesha caalamku waa in ay garab istaagto dadka Soomaaliyeed.